Германија доби вајлд-карта за Катар на местото на Австралија

Меѓународната ракометна федерација му додели вајлд карта на Германија на местото на претставникот на Океанија, репрезентацијата на Австралија. Одлуката кој ќе ја добие вајлд-картата е донесена врз база на резултатите од последниот мундијал во 2013 година, односно на тимот што е најдобро пласиран, но не успеал да обезбеди место на овој мундијал преку континенталните квалификации.

Германија не ја мина Полска во квалификациите и тоа беше голем удар за репрезентацијата од најсилната лига во светот. Сега со пласманот на светското првенство во Катар, селекцијата на Германија ќе има шанси да се бори и за Олимписките игри во Рио де Жанеиро, чии што единствен филтер е пласманот на овој мундијал и дополнителните квалификации кои ќе произлезат веднаш по првенството.