Репрезентативците пристигнаа во Македонија

Ако густата магла и лошите временски услови беа проблем за летот до Данска на ракометната репрезентација на Македонија на 11 јануари, денес без никаков проблем, репрезентативците кои го освоија 10 место на континенталниот собир во Скандинавија близу 15 часот слетаа на аеродромот „Александар Велики„ во Скопје, по два и пол часовен лет со чартер лет Билунг-Скопје.

Од денес репрезентативците се ослободени од своите обврски кон дресот со државниот грб и се враќаат кон обврските во своите клубови. Сите со нетрпение го очекуваме нашиот следен противник во јунскиот бараж, за мундијалот во Катар. В недела неколку минути после пладне од Хернинг ќе стигне веста за тоа каква среќа имавме овој пат во ждрепката.